In English, please
Знайшлі памылку ў тэксце?
Вылучыце яе з дапамогай мышкі і націсніце
Шчыгел – птушка 2018 года!

Грамадская арганізацыя "Ахова птушак Бацькаўшчыны" (АПБ) выбрала птушкай 2018 года шчыгла!

У рамках кампаніі "Шчыгел – птушка 2018 года" арганізаваны шэраг конкурсаў і мерапрыемстваў, мэта якіх паказаць прыгажосць і прыцягнуць увагу да праблем гэтага віду. Спампаваць палажэнне конкурсаў у рамках кампаніі "Шчыгел — птушка 2018 года."

Каб пазнаёміць вас з птушкай года,  асаблівасцямі яе жыцця і цікавосткамі, характэрнымі для гэтага віду, мы падрыхтавалі прэзентацыю "Шчыгел  — птушка 2018 года"Спампуйце яе з нашага сайта!

Шчыгел умее здзіўляць. Не верыце? Прапануем вашай увазе
10 цікавых фактаў пра шчыгла 

Калі ў вас ёсць  карысныя ідэі і прапановы, якія можна ажыццявіць у рамках кампаніі, дасылайце іх, калі ласка, на паштовую скрыню каардынатара salavei@ptushki.org.
Будзем вельмі ўдзячныя!

Нацыянальная кампанія "Птушка года"

Нацыянальную кампанію "Птушка года" АПБ праводзіць з 2000 г. Галоўная мэта кампаніі – прыцягнуць увагу насельнiцтва да хараства прыроды і птушак, што жывуць вакол нас. У мінулыя гады сімваламі Беларусі былі: белы бусел, белая пліска, авяльга, дамавы верабей, гарадская ластаўка, барадатая кугакаўка, кнігаўка, звычайны салавей, вялікая белая чапля, шэрая гусь, сокал-пустальга, вялікі кулён, чорны свіргуль, удод, звычайная зязюля, вушатая сава.

Прыродаахоўныя мерапрыемствы ў межах кампаніі

Адной з пагрозаў для шчыглоў і іншых птушак з’яўляюцца шкляныя вокны – птушкі не заўважаюць іх і разбіваюцца. АПБ заклікае размяшчаць на такіх паверхнях адмысловыя налепкі, гэта зменьшыць колькасць птушыных ахвяраў. 

Свойскія і бадзяжныя каты таксама скарачаюць жыццё птушцы года. Калі ў вас ёсць кот, паклапаціся пра тое, каб надзець яму ашыйнік са званочкам – кот не зможа ўпаляваць птушку года. 

Сустрэлі птушку года — занясіце інфармацыю пра сустрэчу ў базу дадзеных. Кожная сустрэча гэтай птушкі — і зімой і летам — вельмі важная. Дапамажыце навукоўцам скласці мапу!

Паслухаць голас птушкі 2018 года і паназіраць за яе паводзінамі можна ніжэй на відэа фільме студыі Ігара Іванавіча Бышнёва «AVES». Іншыя фільмы гэтай студыі тут.