Грамадская арганізацыя «Ахова птушак Бацькаўшчыны», Нацыянальны парк «Белавежская пушча» і Франкфурцкае заалагічнае таварыства прадстаўляюць супольны праект пра жыццё ваўкоў у пушчы.

Фота А. Пекача

— Мы даследуем ваўкоў ужо трэці год, і бачым, што ў нашых даследаваннях ёсць шмат цікавага для шырокай грамадскасці, — кажа каардынатар праграмы Віктар Фянчук. — Цікавасць да ваўка ў людзей заўжды была большай, чым да іншых жывёлаў. Таму мы і вырашылі стварыць сайт, дзе маглі б трансляваць свае даследаванні ў папулярнай форме. Да таго ж, гэтая інфармацыя, як мы бачым па «сюрпрызах», што падкідаюць нам ваўкі, будзе цікавая не толькі беларусам, але і нашым польскім і ўкраінскім сябрам.

Як гэта працуе?

Па Белавежскай пушчы бегаюць ваўкі, на якіх мы апранулі GPS-ашыйнікі: цяпер за прыгодамі чатырох драпежнікаў можна сачыць на адмысловым Воўчым блогу — сайце Vouk.by.

Пра што ты даведаешся з блога:

Фота А.Пекача

•             Што смачнейшае — алень ці лось? А можа, увогуле дробныя грызуны?

•             Як пераходзіць дзяржаўную мяжу, калі ты — воўк.

•             Ці проста ваўку легчы адпачыць ускрай гасцінцу старога?

•             Як ваўкі бавяць час у міжнародных вандроўках?

— Наша задача — паказаць ролю ваўкоў у экасістэме, — кажа Віктар.— У нашай краіне ваўкі лічацца непажаданымі жывёламі нават на тых тэрыторыях, якія мы самі аддалі прыродзе. Нам важна, каб стаўленне чалавека да ваўка грунтавалася не на нейкіх старадаўніх забабонах, а на навуковых дадзеных. А гэта дапаможа людзям зразумець ваўка і даць яму законна існаваць.

Далучайся да нас — абірай свайго ўлюбёнца і наперад, у вандроўку па пушчы!